منتديات سلايل عبس | بني رشيد - محاورة القرقاح والعير

سلام الله عليكم عند شيخاً من شيوخ مطير
ماوجهنا مع الخط الطويل الا علـى شانـه
ابارك للرجال اللي لهـم بالمجتمـع تاثيـر
سلامة خادم البيت الحرام وممـن اركانـه

عبدالله العير

هلا يامرحبا والسلم مابين الرجال يسير
ومن ضيع سلوم الناس ماله عندنا خانه
انا بعطيك معناً يالعبيدي مايبا تفكيـر
حصاناً طبّ له ميدان ماهو مثل ميدانه

فلاح القرقاح

يقولون الوعد في رحله التقديـم والتاخيـر
وانا اقول الوعد لاواجـه الديـان ديانـه
وانا بعطيك حطمه واعتبرني معك فاعل خير
ترا الفرّاع يلقاله حصاتـةٍ بيـن حجانـه

عبدالله العير

ترا وادي حنيفه سال ثم اغرق بيوت سدير
وانا جيتك وكلٍ يغـرف الميّـه بقدحانـه
وش اللي دخل الفرّاع في هوشه عمر وعمير
لو اني عندهم فالهـوش جودتـه بحنكانـه

فلاح القرقاح

وانا بجيك قبل تغيب شمسك والكبير صغيـر
بعلماً حضره هدهد سبأ من فوق جنحانـه
تصاحب لك صحيباً غير وسمه غير وسمك غير
الا ياللي بنيـت البيـت لاتنهـد جدرانـه

عبدالله العير

ليا شكيت فيها حطها فأيسر جناح الطير
انا ماني وكيل الطير أفتش ريش جنحانه
انا حصلت مجنوناً وقف لي عند جمّ البير
يذري ناس ولاّ ناس تسرح منه ضميانه

فلاح القرقاح

وانا ماني بفسر لي علومـاً ماتبـي تفسيـر
اوثقها على وثق الحطـب لاثـار دخانـه
لعل اللي حرمكم فالضحا يرزق فلاح عصير
قليل المُلك رزقه متّسـع وايـداه مليانـه

عبدالله العير

على الله يافلاح المبتدأ والامر والتدبيـر
يضيق العود يوم انه ماحصل عيش ورعانه