فهاد ناصر
تعال يامصلح ولد عـياد شاعـر ومخـبـور = ياكثر من سمي بمصلح مير مالله مصلحه
انا اعرف انه مايحول بالصقور الا النقور = لـكـن عـرف الطيبين ولامـعـرفة مصـلحه
مصلح بن عياد
فــهـاد يافــهـاد حـذرى لاتـلــف ولاتــدور = ان كان عندك علم واضـح للرياجيل اشرحه
انت مخبور وفيك خير ولايجي منكم قصور = اسرح لياشفت الرعايـا سارحه ومروحه
فهاد ناصر
الكلـمه اللي ماتطـلعها الحناجر بالــصدور = احـسن ليا صـارت بقـلـبه لو اذمـه وامـدحه
بالله يابن عياد وش حدك تجي شهاد زور = وانت رجل من ناس والملحد تقوم وتذبحه
مصلح بن عياد
الكلمه اللي مالـها في ساحة المــيدان دور = يالـيـت راعيــهـا يخـفيهـا قبـل ماتفــضحه
اتهــمتني بالـزور وانا شـاهد شهـاد نـور = اللي يبي يجرح شعور الناس لازم تجرحه
فهاد بن ناصر
ياراعـي الكلمه تـعذر مير منـته بـمعذور = بعض السوالف ماتجي بالممسيه والمصبحه
انا اعرف انك تعرف المعنى بجنحان الطيور = لكن هذي درس والبحر بطريقك واسبحه
مصلح بن عياد
الـعـذر عـبي للرجال اللي يغوصـون البــحـور = وان ماقبلت العذر دورلك جبل ثم انطحه
اخطيت من لحم الضبا واكلت من لحم الجزور = ماعاد باقي لك طلب ريح ضميرك ريحه
فهاد بن ناصر
ياحــارثي ماعـلم الغازين ياغير السبور = وشفيك يوم تشوف دربي من بعيد وتسنحه
تبي تعبر بالسوالف مير ماحاصل عبور = هـذا انت هذا وانـت لو اتصك باب وتفتحه
مصلح بن عياد
دربك ماهو واضح وانا رجال ماعندي غرور = لـفيـتها لـفة سيـور الدينـمو للمـروحـه
احسبك رجال غني اثرك شقاوي ومعسور = واكبر غنيمه يوم تأخذ في يمينك مسبحه