اخذت من مر الليالي تجاريب
حتى عرفت الحق بينه وبيني

الي رحل عني وانا حالي اصعيب
جعله بحزات الرخى مايجيني

اخر لقانا دون شرها ومعاتيب
يومني انثر حق حنينه حنيني

ما اذكر انه بادين مني العيب
هذا هو الي اذكره ياضنيني

رتب لقانا ورتب البعد ترتيب
وجيته على الموعد وهو محتريني

وعقب الكلام وعقب ذيك التراحيب
هبت علي اهبوب بعده تحديني

واعلن وداعه دون لا اعلم الغيب
وحطم طموحاتي وحطم سنيني

وخربت حالي ياهوا البال تخريب
انام وصبح بين دمعي وونيني

ومن عقبها اذكر جروحي معاطيب
بانت لكل الي يناظر بعيني

وقاويت نفسي لين مازادبي الشيب
مثل الكسير الي يدور موعيني

واي والله اذكر كلمتن عيت اطيب
وحاولت اللينها وعيت تليني

الي ذبحني وصوب القلب تصويب
للحين باقي بالمسامع رنيني

قال الوداع وودع القلب بالطيب
وعقب الموادع والمفارق يبيني

ماقلتلي ابعد وخليك وغيب
وشفيك يوم اني تركتك تجيني

نواف السويفان💫