انا البارحه عيت عيوني تذوق النوم

#1 02-07-2013, 07:10 AM

انا البارحه عيت عيوني تـذوق النـوم
سهران لين النور أقبـل بـي سراجـه

هواجيس في بالي وضيقة وزود همـوم
ونار المفارق داخـل الصـدر وهاجـه

سبايب وليفٍ ياعرب منه أنـا محـروم
وهو خابر أنه غايـة القلـب وعلاجـه

احبه ولا أرخصته ولا هو رخيص السوم
غلاه برياض القلب شيًد بـي سياجـه

وعن حب غيره خافقي والعيون تصـوم
لانـه هـوى بالـي وبابـه ومزلاجـه

غرقت فبحر حبه وأنا ما أجيـد العـوم
ورضيت بعذابه لي وأنا حيل محتاجـه

وأنا ماسمعت اهل العذل والعتب واللوم
ولاطعـت نـاسٍ بالمحبيـن هـراجـه

لي أعوامٍ أترجًا اللقـا واللقـا معـدوم
لعل وعسى في يوم أشوفـه ونتواجـه

أبصبر على الفرقا كما يصبر المحكـوم
على أيام سجنه يحتري لحظـة فراجـه

زمانك زمانك أغنمـه لاصفالـك يـوم
وبحر الهوى أحـذرَه لشًتـدت امواجـه

ومادامت لكسرى على شان لـك تـدوم
ولكنً هـاذي هـي سلومـه ومنهاجـه

وانا البارحه عيت عيوني تذوق النـوم
وهو مادرى عني يتقلـب فـي ديباجـه

,
.
,