البارحه بالنوم جاني وليفي

البارحه بالنوم جاني وليفي
ياحلو لو بالحلم شوف الولايف

جاني وليفي في مكانن نظيفي
مكشوف لاخايف ولاني بخايف

بشفاه كلمني كلامن لطيفي
مثل الدررمنظوم بين الشفايف

حلو الوصايف مالوصفه وصيفي
عن مثل وصفه يقصرن الوصايف

مع الجمال اللي بهرني شريفي
يغضي بطرف الناعسات العفايف

جاني عفيف وراح مني عفيفي
على عفافه والسوالف طرايف

طيفه شرح صدري ربيعي وريفي
ربّع بقلبن ذاق مر الكسايف

يا جامع بالحلم طيفه وطيفي
من بين خلقن من جميع الطوايف

تروف بالجسم النحيل النحيفي
يارب ماغيرك رؤف ورايف

يارب يارب القوي والضعيفي
ترحم بحالي وانت عارف وشايف

الشاعر:- موسى بن عمران الرشيدي