أحمر~ أصفر~فوشي~أخضر - الي ودتس بوهـ

موضوع شدني فيه خفة ظل كاتبته واحببت نقله للفائده

السلآم عليكن وحدة وحدة بأسمهآ

صبآحكم | مسآءكم جمآل وبيوتي

اليوم جبت لكن ، شي خطنطير ..
أبيكم تركزون معي حبتين شوي ..
الموضوع طويل ، ولكن فآئدته كثيرة ..

نقول بسم الله ..

Lipsticks
&

Glosses

بِما إنّ الحريم معروفات بكثرة الحتسي والبربره .. وبِما إنّ مصدر هالحتسي هو الخشّه طبعاً .. لذلك وجب الإهتمام بهذه الخشّه وزبرقتها لأنّها محطّ الأنظار ..
و ع هالأساس اخترت موضوعي لليوم لأهميّته الشديده ووشسمه ..
شفتوا إنّي حكيمه وما اختار اي شيّ <-- هالحين ذي مقدّمه ؟ الله يكفلتس مير

تنويه صُغننّ قبل لا ننْطلق /
الموضوع مليان صور تقل كتالوج , لذلك تصبّري

الأساس

بِما إنّ كل شي له أساس <-- وش جايها ذي على بما إنّ ؟ ,
المهم انه مايصلح تملطين الروج كذا على شفايف رايحه في أمّها ومتقطعه حتت من التعضيض والبهذله اللي تجيها من الحاله النفسيه , والله منب ارحم احد قدّ الشفايف والاصابع يحول انتي اللي يضيق صدرتس وهم اللي ياكلونها وتجي الحرّه فيهم

الزبده
إذا ضاق صدرتس لا تعضضين شفايفتس لو سمحتي يعني + شوفي هالمُنتجات اللي اعتقد الكلّ يستخدمها ومعروفه قداً

زي منتي شايفه /

ال ( Labello ) .. أشهر مُرطِّبات الشفايف وأبطلها على الإطلاق .. من يوم خبرت عمري وانا اشوفه واستخدمه

مُرطّبات الشفايف من بودي شوب .. نَكهات مُختلفه وشي يوسع الصدر

البطل الخارق .. سوبر مان الكريمات واللوشنات .. حبيب العجز والشغّالات .. قاهرهم .. (الفازلين ) ابد أسهل شي متى ماحسيتي بجفاف في شفايفتس اقرب فازلين وغرقيها .. برضو حلو قبل لا تنامين

سمعت برضو عن الفقس .. قالوا لي ادهني شفايفك فيه ونامي وتصحين تلاقينها ملساء <-- اما ملسا ههههه .. و ورديه ومدري وش .. جربته والله وصار زي ماقالوا ..بس أول مره ارتعت صراحه قمت ولقيت شفايفي تروّع تسنها براطم شسمه بعدين ثاني وثالث مره لا بالعكس .. مير اني سحبت عليه ما عمري استمريت ع شي الحمد لله

طيب ياحلوه هذي مُنتجات الترطيب وخلصنا منها ( على انّهم واجد والله اللي مُنتجات ترطيبهم منهم وفيهم ابد والله متى ماحسّت ان شفايفها يابسه شسمه وخلصنا <- الله يقرفتس بلا ) ,

،،

نجي الحين لتقشير الشفايف وعَمل المساجات لها ( ايه وش فيتس تناظرينها كذا باحتقار ؟ لها مساج يافرقى وتقشير وكلش حالها حال غيرها ) ..

ال مفروض ياحلوه من وقت ل وقت تسوين تقشير لشفايفتس باستخدام فرشة أسنان + فازلين أو / زيت زيتون وتحركينها ع شفايفتس بلُطف ورقّه لين تزيلين القشور والخرابيط ..
وهالطريقة معروفه اعتقد بس من يستمر ويسويها بشكل دوري

برضو المساج باستخدام الفازلين ابوه للجنّه تدهنين شفايفك فيه وتدكينها باصبعك مثلاً لتجديد الدوره الدمويه وإكساب الشفايف لونها الطبيعي

ادري ان فيه أشياء وخرابيط واجد للشفايف ومدري وش .. لكن اللي ذكرتهم مُجرّبات وناتشورال

نطّب في العميق دحين

أولاً /

راح اتكلّم عن ( الروج ) <-- هههههه على اني منب مره على الأيقونات ذي بس جازت لي هذي والنظره أليمه بعد ) ,
الروج ..ذلك الشي البطل الأكّه .. اللي كان زمان هو راس مال الميك اب .. ابد عندتس روج ؟ إذن عندتس ميك اب إن بغيتيه شادو صار لتس شادو .. إن بغيتيه بلشر برضو صار .. بتاع كلّو

وما زال مُحافظ على دوره الفعّال .. أنتي جربّي تمكيجي وحطيكلش باستثناء الروج .. وشوفي وش بيصير شكلتس !! <-- هذي والله البلشه ! درينا يختي انه مهم ..

نبدأ في المُحددّات ( ) /

هالشي واجد يتجاهلونه وما يهتمون فيه .. اللي هو المُحددّ .. وطبعاً يمّي أنا ما أتكلّم عن مُحددّات قبل ذيك اللي تجيتس أورانج ولا خربزي والروج بني مثلاً ! .. لا تجيبين لتس مُحددّ أغمق من لون الروج اللي بتستخدمينه بدرجة وحده بسّ
المُحدد يرتبّ شكل الشفايف ويساوي الروج ويضبّط الموضوع يعني ..لكن بدونه الدعوه سايحه ع بعض ..
أيّ اسئله بخصوص المُحددّ ولا نطمر للي بعدو ؟ <-- عطوها جوّها تكفون

brb~

بآك ~

نجي للروج

عندنا 3 ألوان أساسيّه /

الأحمَر
فِتنه وأنوثه صاخِبه

اللون الأكثر رواجاً والأكثر شسمه <- توهقت ,
مُبهر .. صارخ .. وه بس
يا إنّي اروح وطي مع الروج الأحمر ولو اشتري منه إلى باتسر مايسّد ..
طبعاً الأحمر ما ينحطّ بأي مكان أو زمان .. لا له وقته

الا ما تلاحظون هنا ان البنات ما عندهم وسط .. امّا أدمنت الروج الأحمر وحطته وين ماراحت حتى لو الصباح بالجامعه / الكليّه تلاقينها كاشخت(ن) به بكل ثقه وين ياخاله ؟ ..
ولا تجيتس مهيب تطيقه ابد وعندها فوبيا ههههههه وإن حطّته ابد تقعد تحرقص وكلها دقيقتين وهي تركض للمغاسل تمسحه
دا الأحمر قميييل يخوانّا بس احسِنوا استخدامه

احذري الأحمر في الحالات التاليه /

- إذا لبستي شي مشجّر <-- شخباري يا مشجّر ؟! المهم ان فيه ألوان واجد وحوسه , لا تفكرين بالروج الأحمر ابد ..
- الصباح طبعاً لان شكلتس بيصير بايخ وسامج وكلن بيذب عليتس
- إذا كنتِ بزر أو مراهقه بالأصحّ بتصيرين عانس وحُرمه صغيره
- إذا كانت شفايفك كبار مره بزود يعني .. حاولي ماتستخدمين الأحمر لانه لون مُلفت وبيزود حجمهم أكثر ..

،،

عزّ الأحْمَر /

- في الزواجات
- مع فَساتين ساده ( أسود - أبيض - أوف وايت ) خصوصاً إذا جاتس الفستان أسود + أوف وايت وكملتيها بالروج الأحمر
- مع ملابس بألوان باهته وساده .. يبيّن الأحمر ويصير شكلتس واو
- مع لوك الستّينات ..

،،

وُجوه ب
الأحْمَر

[

أكره الشينه سيرين عبدالنور هففف <--

طبعاً تراعين في اختيارك للون الأحمر تناسقه مع لبسك + المناكير ( مُهمّ التناسق بين المناكير والروج )
كمان مُهم التناسق بين ميك اب العيون و .. لازم يكون متوازن

،،

الوَردِي
طُهر و ملائِكيّه

<-- لا اليوم ذي ميب عاقله ابببد

الوردي اللون العملي والمُناسب مع كلّش
( طبعاً الوردي يشمل البينك بتدرجاته ومنها الفوشيا .. فاضين للفوشيا حنّا نحط له تقسيمه لحاله ؟! )

حلو صَباح .. مَسا .. طلعات خفافيه .. جاكم احد بالبيت وهه يعني ..
مُناسب لأيّ فئِه عُمريه .. بنوتات صغار .. مُراهقات .. صبايا .. حريم صدقيات بس موب عجز عاد
حلو مع فساتين ناعمه .. سبورات اي شي

،،

خشش ب
الوَردِي

( ريّانا والله يا انتي خاطمه غلللط بس مايمنع انتس انيقه )

تلاحظون كيف رايق بتدرجاته كلها .. من الفوشيا إلى اللون الشسمه ( شبه لحمي الظاهر مابي احط في ذمتي )
وزي ماقلنا تراعين تناسقه مع اللبس + المناكير

،،

الذَهبي أو البيج

( قضى حتسيي ذاك طُهر وما طُهر وفتنه .. معليش يالذهبي من سبق لبق ) <-- ؟؟!

اتعب انا

طبعاً تدرجات الذهبي والبيج والنحاسي وذا مايختلف اثنين على روعتها
وتزداد روعة ورونق ( قهر ليتني حاطّه رونق فوق ) ايه تزداد روعه وشسمه على السُمر وذوات الألوان النُحاسيه

مير تراني ناسيه في الالوان اللي فوق اقول انّه لازم تراعين لون البشره يا تسبدي انتي يعني عندتس الفوشي الصارخ مثلاً مب لايق ابد ع السمرا <-- طيب ياللي منب قايله ورا ماترقين تعدلينها ؟

هالتدرجات حلوه للشتاء
و مدري والله عاد متى ماشفتيها مناسبه وكذا حطيها أنتي أبخص باللي يناسبتس ولا ؟ <-- واضح ان جاها النوم

،،

كثير منّا تصير معها هالحركه وهي ولا جابت خبر .. ما تدري الا يقولون هيه يافلانه مسّحي الروج اللي ع سنونتس



لِتفادي هذا الشيّ /



أولاً .. لا تكثرين روج لو سمحتي .. يعني مب مية الف طبقه
ثانياً .. إذا تروّجتي .. جيبي منديل واطبعي بوسه خفيفه عليه عشان يخف الروج.
ثالثاً .. صرّي شفايفك ع شكل دويره ثمّ جيبي اصبعتس ولبسيه منديل مدري وشلون اشرح بس وامسحي به ع الروج .







سامجه هالحركه مره
ياليت تنتبهين يابعدي وانتي بمسيار او عزيمه .. مهب تقحنين القهوه ولا الشاهي وذا الخشّه مغير تطبّع من ذا الروج وتمدينه للي تصب لتس وانتي ولا طقيتي خبر لا بي كيرفول - ذوقياً مب حلوه ابد -
احرصي كل مره تشربين فيها تمسحين بالمنديل مكان الروج
وبرضو بالنسبه للملاعق وتسذا حاولي وانتي حاطّه روج ما تدخلينها كلها بخشتس ..
الله يذكر ايام اول بالخير اذكرني وأنا صغيره إذا حطّتلي امي روج خلاص وخري عنّي اصنننننّم معد اتحرك ولا حركه لين يروح عني ولا يبقى له أثر ( ادري خطمه بس طرت ع بالي عاد ) ..




ايه بعد يقول لتس إذا كانت شفايفتس مب متناسقه .. يمديتس تحطين ع الجهه اللي تبين تبرزينها أكثر لون فاتح

بكره اكمل الموضوع تعب..برب

اسمح لي ابدي اعجابي بقلمك وتميزك واسلوبك الراقي وتالقك

ثانياً /

القلوسات

من الآخر تسذا .. منيب متكلمه عنها واجد لسببين /
- دخت معاد اشوف
- منيب أحبها ومالي معها هاك العلاقه يعني .. علاقه قديمه ايام المراهقه وانقطعت خلاص
الحين إخلاصي كله للأرواج

ماعلينا .. القلوسات تذكرون موضتها بالله وأول ما طلعت يا حنا طحنا فيها طيحه .. أذكر أول مره شفت القلوس وبوصّفه لبنات خالاتي كان وصفي أليم هههههههههههههههههههههه
ما كنت أعرف اسمه الصدزي

القلوسات حلوه للجامعه / المدارس / البيت هيك يعني .. لأنها مره خفيفه ويالله تنشاف
برضو حلوه مُكمله لروج ماعجبتك درجته أو صار ماش .. حطي عليه قلوس ويتغير

حذاري !! <-- الله يخلص هاليوم ع خير
حذاري تكون شفايفتس كبار مره ومكتنزه وتمردغينها بالقلوس صعبه مرره
بس الظاهر مافيه الا حذاري وحده

طبعاً القلوسات لها آلاف التدرجات من البينك والأحمر والذهبي وإلخ .. منيب احبها ياعالم خلاااص

انتهى الموضوووع...بنقل ضيء..

اقتباس : المشاركة الأصلية كتبت بواسطة مختار الرشيدي [ مشاهدة المشاركة ] اسمح لي ابدي اعجابي بقلمك وتميزك واسلوبك الراقي وتالقك

مخــتار..
لي شرف إطلالتكـ..وتشجيعك لما يخطه قلمي,,
اعجابك وسام لي..

لك مني كل الشكر والاحترام..

: ههههههههههههههههههههـ موضوع بطل بس الاسلوب شي ثآني اما الفازلين بتاع كلووو عاد سبحان الله مااحبه احسه يغير لون البشرهـ : انا استخدم هذا للشفايف يعني كواقي وهيك نفس الفازلين بس الطف اما المحدد خخخخخخخخخخخخ ياقدمي افكر ان شاءالله وارد لكاتبة الموضوع خبر يمكن اقنع نفسي واستخدمه هع / ضيونه كووولوو بطل من اول بارت لآخر بارت لاهنتِ .. تحيتي